Lárphointe eolais don Ghaeilge: Nuacht, imeachtaí agus níos mó. . .
Information hub for the Irish language : News, events & more..

Nationalist Carlow 15 Samhain

 

 

Tá Gaeilge anois ag an mbuachaill óg ‘Horrid Henry’ agus aistriúcháin ar 10 scéal de chuid Francesca Simon le cur amach ag Cló Iar-Chonnacht go luath. Is iad Máirín Ní Ghadhra agus Gormfhlaith Ní Thuraisg a chuir Gaeilge i mbéal Dónall Dána, an t-ainm nua atá baiste acu ar Horrid Henry sa tsraith leabhair do pháistí. Tá cúig leabhar sa tsraith ‘Dónall Dána, An Club Rúnda, Sióg na bhFiacla, Míola agus ‘Saibhreas Sciobtha’ le foilsiú  i mbliana.

Beidh fáil ar leabhair eile an bhliain seo chugainn. Is iad sin ‘An Feighlí Linbh, ‘Teach na dTaibhsí, ‘Mallacht an Mhumaí agus ‘Boladh Bréan’.

Is buachaill óg é Dónall Dána a bhíonn de shíor ag déanamh an diabhail agus ag tromaiocht ar a dheartháir agus an crá a thuismitheoirí. Scríobh Francesca Simon an chéad leabhar sa tsraith, a bhfuil 24 leabhar san iomlán inti anois, sa bhliain 1994. Is iomaí foilseachán eile ina bhfuil Horrid Henry ata curtha amach ó shin freisin, idir irisí, leabhair jócanna agus leabhar gníomhaíochtaí.

Tá an-tóir ag na leabhair ar fud na cruinne agus is iomaí gradam atá buaite acu. Rinneadh sraith teilifíse i Sasana bunaithe ar an tsraith leabhar agus eisíodh scannán bunaithe ar na leabhair sa bhliain 2011. Ainmníodh an tsraith teilifíse do ghradaim BAFTA faoi dhó.

Bainfidh páistí an-spraoi as Dónall Dána agus as na heachtraí go léir a bhíonn idir lámha aige. Dhéanfadh ceann bronntanas álainn don Nollaig fiú agus seans maith go mbeidh soláthar maith daoibh sa mhála ag Daidí na Nollag chomh maith.

Read 542 times
Rate this item
(0 votes)